«Արցախի ազատագրված հողերը չբնակեցվեցին իշխանությունների ապաշնորհ քաղաքականության պատճառով»,- այսօր լրագրողների հետ հանդիպմանը հայտարարեց «Արաբո» ջոկատի հրամանատար Մանվել Եղիազարյանը` պատասխանելով Aysor-ի հարցին, թե ինչպե՞ս կգնահատի անցած տարիների դեմոգրաֆիական քաղաքականությունը:

Նա նշեց, որ շատ լավ տեղյակ է, թե ինչ է կատարվում Լաչինում, Աղդամում և մյուս շրջաններում: Մ. Եղիազարյանի համոզմամբ` ոչ մեկը չցանկացավ հայ ժողովրդի համար գլոբալ հարց լուծել. «99 %-ն ուզում են իրենց ստամոքսի, իրենց կեցության հարցը լուծել: Դրա համար ոչ մի բան չստացվեց»:

Ազատամարտիկի խոսքերով, եթե մեկն ունի շատ կապիտալ, շատ սեփականություն, ապա դա քամուն չի տալիս ու չի հրաժարվում, այլ տալիս է վարձով, կամ այլ կերպ է օգտագործում:

«Թող մեզ տան Արևմտյան Հայաստանը, մենք կորոշենք` ինչ անել»,- ասաց Մ. Եղիազարյանն ու հավելեց. «Մեզ սպանեցին, մեր վարկանիշն ընկավ: Հենց Արևմտյան Հայաստանը ձեռք բերենք, Նախիջևան, Ջավախք, մեր ռեյտինգը սարսափելի բարձրանալու է: Էլ մենք 8-9 մլն չենք լինելու, լինելու ենք 18-20 մլն: Հաղթողի շարքերն են համալրում: Թույլերից, պարտվողից բոլորը փախնում են: Ես ուժեղ Հայաստանի մասին եմ խոսում»: