<<Խանդո>> Բարեգործական հիմնադրամ

Արդահանի նահանգապետը ցանկանում է ջավախահայերի միջոցով բարելավել Հայաստանի հետ հարաբերությունները

JAVAXQ — Mon, 20 Dec 2010 08:16:07 GMT

Դեկտեմբեր 20, 2010 | 08:05

Թուրքիայի Արդահանի նահանգապետ Մուսթաֆա Թեքմենը հայտարարել է, թե Արդահանի Աքթաշի (թուրք-վրացական նոր սահմանակետ Ախալքալաքում) սահմանակետի բացումը դրական ազդեցություն կունենա Հայաստանի հետ հարաբերությունների վրա։

Թուրքական Haberler-ի փոխանցմամբ՝ Արդահանի նահանգապետը կազմակերպված մամուլի ասուլիսի ժամանակ խոսել է նահանգի զարգացման հեռանկարներից՝ շեշտելով առաջիկայում բացվելիք Աքթաշի սահմանակետի կարեւորությունը։ «Արդահանը դարձել է Վրաստանի հետ հարաբերություններում օրինակելի մի նահանգ։ Մենք դարձել ենք Թուրքիայի՝ դեպի Կովկաս բացվող դուռը»,-նշել է Մուսթաֆա Թեքմենը։

Նահանգապետը շեշտել է, որ նոր սահմանակետի բացումով կավելանա երկխոսությունը Վրաստանում ապրող հայերի հետ, քանի որ այդ շրջանում(Ախալքալաք) մեծ թվով հայեր են ապրում։ «Այսինքն, այն Թուրքիայի եւ Հայաստանի միջեւ առկա հարաբերություններում կարեւոր նշանակություն կունենա»,-ընդծել է Արդահանի նահանգապետը։

Մեքսիկայում բանտից փախել են 150 դատապարտյալներ՝ բանտապետի հետ

JAVAXQ — Sat, 18 Dec 2010 17:23:41 GMT

Դեկտեմբեր 18, 2010 | 10:18

Առնվազն 150 դատապարտյալներ փախել են մեքսիկական բանտից, որը գտնվում է ԱՄՆ հետ սահմանից ոչ հեռու: Դատապարտյալների մեծ մասը բանտարկված էր թմրավաճառության համար:

Բանտը, որից հաջողվել է զանգվածային փախուստ իրականացնել, գտնվում է Տամաուլիպաս նահանգի Նուեւո-Լարեդո քաղաքի արվարձանում, հաղորդում է «ՌԻԱ Նովոստին»:

Բացի բանտարկյալներից, կորել է նաեւ բանտապետը, որին իշխանությունները կասկածում են փախուստի հանցակցության մեջ: Քննությունը կասկածում է, որ փախստականներին օգնել են եւ այլ բանտապաններ:

Գագիկ Ծառուկյան. «Բարգավաճ Հայաստանի» կոալիցիայից դուրս գալու հարցը չի քննարկվում

JAVAXQ — Sat, 18 Dec 2010 17:16:47 GMT

Դեկտեմբեր 18, 2010 | 14:21

«Բարգավաճ Հայաստանը» կոալիցիայից դուրս գալ չի պատրաստվում: Այս մասին NEWS.am-ի լրագրողի հետ զրույցում ասել է կուսակցության նախագահ Գագիկ Ծառուկյանը:

Ինչ վերաբերվում է լրատվամիջոցներով շրջանառվող լուրերին, որ Ծառուկյանը հետ է կանչելու կուսակցական նախարարներին, նա նշեց որ «Բարգավաճ Հայաստանը» այդպիսի մտադրություն չունի:

«Մենք մեր նախարարների աշխատանքից գոհ ենք. մանավանդ առողջապահության նախարար Հարություն Քուշքյանից՝ չնայած այն բանին, որ հենց նրա անունն է որպես հետ կանչվեղ շրջանառվում»,- հայտնել է Գագիկ Ծառուկյանը:

Ադրբեջանը բողոքի նոտա է հղել հայկական պատվիրակության դեմ. Պատճառը Ջուղայի խաչքարերի վերաբերյալ ֆիլմն է

JAVAXQ — Tue, 14 Dec 2010 09:45:40 GMT

Եվրախորհրդարանում Ադրբեջանի ներկայացուցչությունը, ինչպես նաեւ Ադրբեջանի ԱԳ նախարարության ներկայացուցիչը բողոքի նոտա են հղել եվրախորհրդարանի ղեկավար Եժի Բուզեկին` ընդդեմ Հայաստան-Եվրամիություն միջխորհրդարանական հանձնաժողովի հայաստանյան պատվիրակության:

Բողոքի նոտա հղելու առիթը եղել է Եվրախորհրդարանի՝ Բրյուսելում դեկտեմբերի 1-2-ին տեղի ունեցած նիստի ժամանակ ցուցադրված «Ջուղա. 21-րդ դարի վանդալները» վերնագրով վավերագրական ֆիլմը: Այնտեղ պատմվում է, թե ինչպես են ադրբեջանցիները ոչնչացնում հայկական գերեզմանները:

ԵԽ-ում Ադրբեջանի ներկայացուցիչ Էլհան Պոլուխովը դժգոհել է, թե ինչու Եվրախորհրդարանը չի կանխել հայկական կողմի «փաստերը խեղաթյուրելու» եւ ԵԽ պատգամավորներին թյուրիմացության մեջ գցելու փորձը, ինչից հետո էլ որոշել է բողոքի նոտա հղել:

«Ես հումորով եմ վերաբերվում ադրբեջանական կողմի բողոքի նոտայի ձեւակերպումներն, որտեղ ամեն ինչ զավեշտի է հասցված, քանի որ նշվում է, թե ընդհակառակը՝ իրենք ուշադիր եւ հոգատար են այլոց մշակութային ժառանգության հանդեպ: Եվրախորհրդարանի մեր գործընկերները հնարավորություն ունեցան ֆիլմի միջոցով տեսնելու այդ «հոգատարության» դրսեւորումները, թե ինչպես են ադրբեջանցի զինվորները կացնահարում հայկական խաչքարերը, ինչպես են բեռնում բեռնատարներն ու թափում անդունդը»,-NEWS.am-ի թղթակցի հետ զրույցում հայտեց պատվիրակության ղեկավար, ՀՀ ԱԺ Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը: Նա հավելեց, որ ֆիլմը մեծ տպավորություն է թողել Եվրախորհրդարանի պատվիրակների վրա:

Զոհրաբյանը նշեց նաեւ, որ իրենք այս գործելաոճը շարունակելու են եւ պատրաստվում են Եվրախորհրդարանի առաջիկա նիստում ցուցադրել «Բաքու, Մարաղա-Սումգայիթ» փաստավավերագրական ֆիլմի սեղմ տարբերակը: «Եվրախորհրդարանի նախագահը այդ ֆիլմը դիտելուց հետո կարծում եմ, նույնպես ադրբեջանական բողոքի նոտաներին կվերաբերվի հումորով, ինչպես եւ մենք», ասաց հայ պատգամավորը:

Զոհրաբյանը նաեւ տեղեկացրեց, որ նիստից դուրս ՀՀ պատվիրակության անդամները բազմաթիվ այլ հանդիպումներ են ունեցել: Մասնավորապես հանդիպել են ԵԽ պատգամավոր Բերտ Սթայսի հետ, ով առաջիկայում այցելելու է Հայաստան եւ Արցախ։ Բերտ Սթայսն, ի դեպ, զբաղվում է նաեւ Ջուղա ԵԽ-ի կողմից դիտորդական առաքելություն ուղարկելու հարցով։

Իսպանական կազմակերպությունը ներկայացրել է Վրաստանի նոր կառուցվող խորհրդարանի շենքի լուսանկարները

JAVAXQ — Mon, 13 Dec 2010 16:26:42 GMT

Դեկտեմբեր 13, 2010 | 18:38

Իսպանական «CMD ինժեներ» կազմակերպությունը, որը Վրաստանի Քութայիսի քաղաքում խորհրդարանի նոր շենք է կառուցում, իր կայքէջում արդեն տեղադրել է նոր շինության լուսանկարները:

Կազմակերպության կայքէջում նշված է, որ ծրագիրն իրականացվում է Քութայիսիի քաղաքապետարանի որոշմամբ: Խորհրդարանի շենքն իր մեջ ընդգրկում է գրասենյակներ, հանդիպումների դահլիճներ, մամուլի ասուլիսի, ինչպես նաեւ լրատվամիջոցների համար նախատեսված հատուկ սրահներ, ցուցասրահներ եւ նստաշրջանի անցկացման դահլիճ:

Իսպանական կազմակերպությունները Վրաստանում արդեն կատարել են մի քանի աշխատանքներ, օրինակ` Բաթումիի նոր ծառուղին, օպերայի դահլիճը, հայտնի ապակե կամուրջը եւ այլն:

ՆԱՏՕ. Այսօր Վրաստանը Դաշինքին անդամակցելու փուլում չէ, բայց...

JAVAXQ — Mon, 13 Dec 2010 16:24:30 GMT

Վրաստանի ՆԱՏՕ-ին անդամակցելը կախված է Դաշինքի կողմից առաջադրված մի քանի չափանիշներից: Այս մասին հայտնում է Մոսկվայում ՆԱՏՕ-ի տեղեկատվական կենտրոնի նոր տնօրեն Ռոբերտ Փշելը: Հայտնում է «ՌԻԱ Նովոստին»:

Նրա խոսքով` 2008-ին Բուխարեստում տեղի ունեցած գագաթաժողովի որոշումը ուժի մեջ է մնում:

«Վրաստանի ՆԱՏՕ-ին անդամակցությունն իրենից է կախված: Երբ պատրաստ լինի` համապատասխանի չափանիշներին, կընդգրկվի Դաշինքի կազմում: Սակայն այսօր Վրաստանն այդ փուլում չէ»,- ասաց Փշելը: Նրա խոսքով` այս պահին Վրաստան-ՆԱՏՕ համագործակցության աշխատանքներ են ընթանում:

«Մենք կաջակցենք Վրաստանի բարեփոխումներին, սակայն թե երբ այդ երկիրը կհամապատասխանի մեր պահանջներին, ոչ ոք չի կարող ասել»,-ընդգծել է նա:

Ազգային անվտանգության խորհրդի նիստում քննարկվել է նորագույն սպառազինության ձեռքբերման խնդիրը

JAVAXQ — Sun, 12 Dec 2010 21:56:50 GMT

Դեկտեմբեր 11, 2010 | 20:19

Հայաստանի նախագահ, Ազգային անվտանգության խորհրդի նախագահ Սերժ Սարգսյանն այսօր՝ դեկտեմբերի 11-ին հրավիրել է Ազգային անվտանգության խորհրդի նիստ:

Նախագահի մամուլի գրասենյակից NEWS.am-ին հայտնում են, որ քննարկվել եւ հավանության է արժանացել «ՀՀ սպառազինության եւ ռազմական տեխնիկայի 2011-2015թթ. զարգացման պետական ծրագիրը»: Այն հանդիսանում է ՀՀ զինված ուժերում իրականացվող միջնաժամկետ պլանավորման աշխատանքների արգասիքներից մեկը եւ մշակվել է 2008թ. մեկնարկած ՀՀ պաշտպանության ռազմավարական վերանայման նախորդ փուլերի արդյունքների հիման վրա: Ծրագիրն ուղղված է ՀՀ անվտանգության ռազմական սպառնալիքների չեզոքացման համար անհրաժեշտ միջոցների ապահովմանը:

Նիստում նշվել է, որ նորագույն սպառազինության ձեռքբերման արդյունքում զգալիորեն կբարձրացվի ՀՀ զինված ուժերի մարտունակությունը, ծրագրի իրականացումը կընդլայնի նաեւ ՀՀ ռազմական անվտանգությունը միջնաժամկետ և երկարաժամկետ հեռանկարում:

ԱՄՆ-ում դատարանը պաշտպանել է Հայոց ցեղասպանության զոհերի հարազատներին

JAVAXQ — Sat, 11 Dec 2010 18:57:37 GMT

NEWS.am-ը ներկայացնում է The Washington Post թերթում հրապարակված Փոլ Էլիասի հոդվածը, որոշակի կրճատումներով:

Դեկտեմբերի 10-ին ԱՄՆ-ի վերաքննիչ դաշտային դատարանը փոխել է իր դիրքորոշումը եւ որոշել, որ Օսմանյան Թուրքիայում իրականացված հայոց ցեղասպանության զոհերի ժառանգները կարող են գումարներ ստանալ այն ընկերություններից, որոնք իրենց հարազատներին են վաճառել կյանքի ապահովագրական պոլիսներ:

ԱՄՆ-ի 9-րդ շրջանային վերաքննիչ դատարանը Սան Ֆրանցիսկոյում վճռել է, որ Կալիֆորնիա նահանգի օրենքը հայոց ցեղասպանության մասին, չի հակասում ԱՄՆ արտաքին քաղաքականությանը:

Անցած տարի նույն դատարանը որոշել էր, որ ԱՄՆ կառավարությունը Թուրքիայի կառավարության կողմում է, ուստի Կալիֆորնիայի նահանգային օրենքը, որը 1915-ի դեպքերը համարել է ցեղասպանություն, չեղյալ է համարվում, քանի որ հակասում է ԱՄՆ արտաքին քաղաքականությանը:
Սակայն այս անգամ դատավոր Դորոթի Նելսոնը կտրուկ եւ անսպասելի քայլ է արել եւ փոխել իր որոշումը՝ անցնելով դատավոր Հարրի Փրեջերսոնի կողմը:

«Մենք եզրակացրեցինք, որ չկա հստակ ընդգծված դաշնային քաղաքականություն, որը կարգելի նահանգներին օգտագործել «Հայոց ցեղասպանություն» տերմինը»,- գրել է Փրեջերսոնը:

Դատարանի որոշումը վերակենդանացրել է ցեղասպանության զոհերի երեք ժառանգների հայցն ընդդեմ գերմանական ապահովագրական ընկերությունների, այդ թվում Munich Re AG-ի:
«Դա կատարվեց անսպասելիորեն: Սա հայ ժողովրդի համար մեծ հաղթանակ է»,- ասել է փաստաբան Բրայան Քաբաթեքը:

Քաբաթեքն ու էլի մի քանի փաստաբաններ նմանատիպ հայցեր են ներկայացրել ընդդեմ New York Life Insurance Co.-ի եւ ֆրանսիական AXA-ի: Այդ հայցերի վերաբերյալ վճիռներ են կայացվել 2005-ին, որի ընդհանուր գումարը կազմել է 37,5 մլն դոլար:

Դատարանը նաեւ որոշել է, որ ապահովագրական ընկերությունները կարող են դիմել դատարան կրկին անգամ դատական լսումներ կազմակերպելու հայցով: Նրանք կարող են դիմել նաեւ ԱՄՆ գերագույն դատարան:

Հրազենային վնասվածք ստացած զինվորի վիճակը ծանր է. նա տեղափոխվել է Երեւան

JAVAXQ — Tue, 23 Nov 2010 17:59:21 GMT

Նոյեմբեր 23, 2010 | 15:06

ԼՂ դիրքերում նոյեմբերի 19-ին հրազենային տարբեր աստիճանի վնասվածքներ ստացած զինծառայողներից մեկը՝ Սարգիս Մելքումյանը, տեղափոխվել է Հայաստանի ՊՆ կենտրոնական կլինիկական զինվորական հոսպիտալ: Նրա վիճակը շարունակում է մնալ ծանր: Իսկ վնասվածք ստացած մյուս երեք զինծառայողները Ստեփանակերտի հոսպիտալում են, նրանց վիճակը գնահատվում է միջին ծանրության: Այս մասին NEWS.am-ին հայտնեց Պաշտպանության նախարարի մամուլի խոսնակ Դավիթ Կարապետյանը:

Հիշեցնենք, որ Լեռնային Ղարաբաղում նոյեմբերի 19-ի գիշերը N զորամասի պահպանության տակ գտնվող առաջնային բնագծում նույն զորամասի ժամկետային 4 զինծառայողներ մահացել են ստացած հրազենային վիրավորումներից, իսկ 4 զինծառայողներ էլ տարբեր աստիճանի վնասվածքներ են ստացել: Տեղի ունեցած միջադեպի հետեւանքով հրազենային կրակահերթերից զոհվել են ժամկետային զինծառայողներ` Լեւոն Սոսի Եսայանը (ծնվ. 1991թ.), Ներսես Վալերիկի Գալոյանը (ծնվ. 1990թ.), Նարեկ Վարդանի Սահակյանը (ծնվ. 1990թ.), Նվեր Մարտիկի Սարգսյանը (ծնվ. 1991թ.):

Հրազենային տարբեր աստիճանի վիրավորումներ են ստացել ժամկետային զինծառայողներ`Սարգիս Հակոբի Մելքումյանը (ծնվ. 1991թ.), Խաչիկ Սարգսի Ալեքսանյանը (ծնվ. 1992թ.), Մասիս Մավրիկի Գրիգորյանը (ծնվ. 1991թ.) եւ Մանվել Արմենի Հազրոյանը (ծնվ. 1991թ.):

ՊՆ քննչական ծառայության 2-րդ կայազորային քննչական բաժնում «2 եւ ավելի անձանց սպանության» փաստի առթիվ հարուցվել է քրեական գործ՝ Հայաստանի քր.օր-ի 104 հոդվածի 2-րդ մասի 1-ին կետի (Սպանություն) հատկանիշներով:

Քրեական գործով կասկածյալը, ով հանդիսանում է նույն զորամասի ժամկետային զինծառայող, ձերբակալված է: Նրա տվյալները եւ քրեական գործի այլ մանրամասներ նախաքննության շահերից ելնելով դեռ հրապարակման ենթակա չեն:

12-ամյա Վլադիմիր Արզումանյանը Լեռնային Ղարաբաղից հաղթել է «Եվրատեսիլ- 2010»-ը

JAVAXQ — Sun, 21 Nov 2010 14:17:12 GMT

Նոյեմբեր 21, 2010 | 01:29

12-ամյա Վլադիմիր Արզումանյանը դարձել է միջազգային մանկական «Եվրատեսիլ-2010» երգի մրցույթի հաղթողը, որը տեղի է ունեցել նոյեմբերի 20-ին, Մինսկում: Նա կատարել է «Մայրիկ» երգը:

«Մինսկ-Արենայի» բեմում իրենց երգերն են ներկայացրել 10-ից 15 տարեկան երեխաներ՝ 14 երկրներից՝ Հայաստանից, Բելառուսից, Բելգիայից, Վրաստանից, Լատվիայից, Լիտվայից, Մակեդոնիայից, Մալթայից, Մոլդովայից, Նիդեռլանդներից, Ռուսաստանից, Սերբիայից, Ուկրաինայից, Շվեդիայից:

Մրցույթի արդյունքները որոշվել են հեռուստադիտողների եւ ժյուրիի քվեարկությամբ:

Մանկական մրցույթի կարգախոսն էր «Feel the magic» («Զգա կախարդանքը»):

Նշենք, որ 2007թ. Հայաստանը մրցույթում ներկայացրել է «Արեւիկ» խումբը՝ զբաղեցնելով երկրորդ տեղը: 2008-ին Մոնիկա Մանուչարովան զբաղեցրել է 8-րդ հորիզոնականը, իսկ անցած տարի Լուարա Հայրապետյանը՝ «Բարսելոնա» երգով զբաղեցրել էր երկրորդ տեղը:

Վլադիմիր Արզումանյանը Աբովյանի անվան թիվ 1 դպրոցի աշակերտ է, նա ծնվել է Լեռնային Ղարաբաղում: