Նոյեմբեր 09, 2010 | 13:26
Ներկա պահին Հայաստանի կողմից ԼՂ անկախության ճանաչումը կարող է հանգեցնել նրան, որպեսզի Ադրբեջանն իրականացնի իր միլիտարիստական սպառնալիքները: Կլոր սեղանի ժամանակ նման կարծիք է հայտնել Ռազմավարական եւ ազգային հետազոտությունների հայկական կենտրոնի ղեկավար Ռիչարդ Կիրակոսյանը:
Նա ընդգծել է, որ ստեղծված վիճակում կարեւորը ոչ թե Հայաստանի կողմից ԼՂՀ անկախության ճանաչումն է, այլ այն, որ ԵԱՀԿ Մինսկի խումբը դե-ֆակտո ճանաչի Ղարաբաղը եւ հիմա բանակցություններ է վարում ոչ թե ԼՂ կարգավիճակի շուրջ, այլ համոզում է Ադրբեջանին հաշտվել Ղարաբաղի կորստի հետ:
«Այնպես որ ադրբեջանցի մասնագետները պետք է Ադրբեջանի նոր քարտեզներ գծեն, քանի որ Լեռնային Ղարաբաղն այլեւս երբեք չի վերադառնա Ադրբեջանի կազմ եւ վերջինը, ով պետք է հասկանա դա, նստած է նախագահական պալատում»,- հայտարարել է փորձագետը:
Նա նաեւ համոզմունք է հայտնել, որ Ադրբեջանը կհաշտվի Ղարաբաղի կորստի հետ միայն այն ժամանակ, երբ ավարտվեն նրանց նավթային ռեսուրսները, կամ երբ Բաքուն պարտվի նոր պատերազմում, կամ էլ երբ այդ երկրում ձեւավորվի ժողովրդավարական իշխանություն:
Ընդ որում, Կիրակոսյանը չի բացառել, որ ԼՂ հակամարտության ավարտի համար պետք լինի եւս մեկ պատերազմ:
Ինչ վերաբերում է Հայաստանի կողմից ԼՂ անկախությունը ճանաչելուն, փորձագետի խոսքով, Երեւանը բաց է թողել հարմար պահերը 1994-ին, հրադադարի պայմանագիրը ստորագրելու, ինչպես նաեւ Կոսովոյի անկախությունը ճաչանելու ժամանակ: «Այսօր շատ կարեւոր է, որպեսզի հայ հասարակությունում բանավեճ ծավալվի այդ թեմայով»,- ամփոփել է նա:
