Ադրբեջանական դիվերսիոն խումբը, որն այսօր՝ սեպտեմբերի 4-ի առավոտյան հարձակվել է Լեռնային Ղարաբաղի դիրքերի վրա, նպատակ է ունեցել գերեւարել որեւէ հայ զինվորի:

Տեղում իրադարձություններին ծանոթանալու համար Լեռնային Ղարաբաղ են մեկնել լրագրողներ, որոնք փոխանցում են, թե դիվերսիոն խումբը բաղկացած է եղել 8 հոգուց: Հակառակորդը ԼՂՀ ՊԲ դիրքերի վրա է հարձակվել 3 ուղղություններով: Դիվերսանտներից մեկը ցատկել է խրամատ եւ ձեռնամարտի բռնվել ժամկետային զինծառայողների հետ: Ժամկետային զինծառայող Արման Մանուկյանին հաջողվել է տապալել ադրբեջանցի հատուկջոկատայինին, իսկ վրա հասած ծառայակիցը գնդակահարել է հակառակորդին:

Սպանված ադրբեջանցի դիվերսանտը եղել է բավական լավ զինված: Մասնավորապես նրա մոտից հայտնաբերվել են իսրայելական արտադրության գիշերային տեսասարք, դանակներ, խլացուցիչով ինքնաձիգ: Նա եղել մոտ 25-30 տարեկան, մկանոտ երիտասարդ:

Դեպքից քիչ անց ժամանել է ՊԲ հրամանատար Մովսես Հակոբյանը, ով ծանոթացել է հանգամանքներին: Գեներալը շնորհակալություն է հայտնել եւ հրամանատարական ժամացույցներով պարգեւատրել է զինվորներին՝ նշելով, որ նրանք պարգեւատրվելու են նաեւ կառավարական արգեւներով:

Ի դեպ, Ղարաբաղի հետախուզությունը տեղեկությունների է տիրապետում, որ ձախողումից հետո ադրբեջանական բանակում իսկական խուճապ է տիրում:

Նշենք, որ սեպտեմբերի 4-ին՝ ժամը 06:50-ի սահմանում ղարաբաղա-ադրբեջանական զորքերի շփման գոտու հյուսիսարեւելյան ուղղությամբ (Ջրաբերդ բնակավայրից մոտ 2կմ արեւելք) արձանագրվել է հակառակորդի հետախուզական-դիվերսիոն խմբի հերթական առաջխաղացման փորձ: ԼՂՀ ՊԲ առաջապահ ստորաբաժանումների կողմից ձեռնարկված համապատասխան գործողությունների եւ ծավալված մերձամարտի արդյունքում ադրբեջանական գրոհայինները` ՊԲ մարտական հենակետում թողնելով 1 դիակ, հետ են շպրտվել: Փախուստի ճանապարհին դիվերսիոն խմբի անդամները պայթել են ականների վրա, կան վիրավորներ: Ըստ հետախուզական տվյալների՝ նրանցից մեկը Ադրբեջանի ԶՈւ հետախուզական, մյուսը՝ սակրավորային վաշտի հրամանատար է: Ղարաբաղյան կողմից կորուստներ չկան:

Ադրբեջանցի հրոսակները դիվերսիոն գործողություններ էին իրականացրել նաեւ օգոստոսի 31-ին Ադրբեջանի եւ Լեռնային Ղարաբաղի զինված ուժերի շփման գծում՝ Վերին Չայլու բնակավայրի ուղղությամբ: Մերձամարտի արդյունքում վնասվածքներ էր ստացել ԼՂՀ Պաշտպանության բանակի զինծառայող Ռուդիկ Մանասերյանը:

Իսկ հունիսի 18-ին Չայլուի ուղղությամբ Լեռնային Ղարաբաղ էր ներխուժել ադրբեջանական զինված դիվերսիոն խումբը: Մարտի ընթացքում հայկական կողմը կորցրել էր 4 զինվոր, եւս 4-ը՝ վիրավորվել էին: