Հայաստանի եւ Թուրքիայի միջեւ դիվանագիտական հարաբերությունների հաստատումն ու սահմանների բացումը օգուտ են ոչ միայն Թուրքիային ու Հայաստանին, այլեւ Վրաստանին, Ադրբեջանին եւ ողջ տարածաշրջանին: Այս մասին հայտարարել է Հայաստանի նախագահ Սերժ Սարգսյանը «Պրոֆիլ» պարբերականին տված հարցազրույցում: Նա նշել է, որ Թուրքիայի հետ հարաբերությունների կարգավորման վերաբերյալ որոշումն իր կյանքի ամենադժվար որոշումներից մեկն է եղել: «Այո’, թուրքերը ցեղասպանություն են իրականացրել: Այո’, նրանք խլել են մեր կենսական կարեւոր տարածքը: Այո’, այդ հանցագործությունից հետո, 100 տարի շարունակ ժխտել ու շարունակում են ժխտել այն, իսկ հանցագործության ժխտումը, գուցե, հանցագործությունից էլ վատ է: Բայց մյուս կողմից, ժամանակակից աշխարհում գրեթե չկան երկրներ, որոնք միմյանց հետ փոխհարաբերություններում չունենան պատմական խնդիրներ ու չլուծված հարցեր: Այդպիսի մարտահրավերներին քաղաքակիրթ պատասխանը լայնամասշտաբ համագործակցությունն է` առանց նախապայմանների»,- հայտարարել է Սերժ Սարգսյանը:
Նրա խոսքով, Երեւանի նախաձեռնությունը թելադրված է եղել սթափ ուղեղով եւ որեւէ կերպ չի հակասել Հայաստանի ազգային շահերին: «Թուրքերի հետ առանց նախապայմանների հարաբերություններ հաստատելու ցանկությունը ոչ մի դեպքում չի նշանակում, որ մենք հրաժարվում ենք ցեղասպանության միջազգային ճանաչման գործընթացից, կամ էլ գնում ենք զիջումների: Թուրքերի կողմից ցեղասպանությունը ճանաչելու համար օգտագործվել են բոլոր ճանապարհները, բացի ոչ կոնֆրոնտացիոն ճանապարհից, երբ կբացատրենք թուրք հասարակությանը այն ժամանակների ողջ ողբերգությունը: Երբ մենք սկսեցինք այս գործընթացը, թուրքական հասարակության մեջ սկսվեցին, գուցե շատերի համար անսպասելի գործընթացներ. Թուրքիայի մեծ քաղաքներում երիտասարդները դուրս էին գալիս փողոց եւ խոսում ցեղասպանությունից»,- ընդգծել է ՀՀ նախագահը:
«Ես սխալ էի համարում վիրավորվածի, ճնշվածի կեցվածք ընդունել եւ սպասել, թե երբ թուրքերն իրենք կճանաչեն ցեղասպանությունը, որից հետո միայն վերսկսել մեր հարաբերությունները: Իմ մոտեցումը միանշանակ չընդունվեց հասարակության, հատկապես երկրի սահմաններից դուրս ապրող հայերի շրջանում եւ դա հասկանալի է: Մեր ժողովուրդը զգացմունքային է, այն տարիներին տուժել է յուրաքանչյուր հայ ընտանիք: Ես հասկանում եմ մարդկանց, որոնց դուրս էին գալիս փողոց, որպեսզի դեմ հանդես գան Թուրքիայի հետ հաշտության քաղաքականությանը: Բայց ես ուրախ եմ, որ ի վերջո, մեր ժողովուրդը հասկացավ այդ գաղափարը: Հիմա, ես կարծում եմ, շատ քիչ մարդ է մնացել, որոնք կարծում են, որ մենք սխալ էինք»,- ասել է Սերժ Սարգսյանը:
«Իհարկե, մեր հարաբերությունները չստացվեցին այս անգամ: Այն բանից հետո, երբ մենք ստորագրեցինք հայ-թուրքական հայտնի արձանագրությունները, թուրքական կողմը հրաժարվեց դրանք վավերացնել իր խորհրդարանում: Հիմա մենք սպասում ենք, թե երբ Թուրքիայում կհայտնվեն ուժեր ու առաջնորդներ, որոնք պատրաստ կլինեն քաղաքական կամք դրսեւորել»,- ամփոփել է ՀՀ նախագահը:
